یہ ونڈوز کے موجودہ کمپیوٹر آپریٹنگ نظام ونڈوز 8 کی جگہ لے گا۔
یہ آپریٹنگ سسٹم موبائل فون، ٹیبلٹ، پی سی، ایکس باکس گیمز کنسولز وغیرہ جیسے مختلف قسم کے آلات کے لیے کارآمد ہوگا اور اسے سنگل سٹور سے فروخت کیا جائے گا۔
اس میں ایک بار پھر سے سٹارٹ مینو واپس آیا ہے جو ونڈوز 8 سے ہٹا لیا گیا تھا۔
کمپنی کا کہنا ہے کہ سٹارٹ مینو کی واپسی اور ان سہولتوں کی فراہمی کا مقصد ونڈوز 7 اور ونڈوز8 کے صارفین کو ہم آہنگی کا احساس دلانا ہے۔
اس نئے آپریٹنگ سسٹم میں صارفین کے پسندیدہ ایپلیکیشنز کی ایک فہرست کے علاوہ لائیو ٹائلز بھی ہوں گے اور ٹائلز اور مینو کے عنوانات کے سائز میں تبدیلی لانے کی سہولت ہوگی جیسا کہ پی سی اور ٹیبلٹ کے لیے ونڈوز 8 میں دستیاب تھی۔
اس کے ذریعے تازہ ای میلز، فیس بک میسیجز اور موسم کی پیش گوئیوں کی اپ ڈیٹس سے متعلق ایپلیکیشنز کی جاری کردہ تازہ معلومات فوری طور پر حاصل ہو سکیں گی۔
اس آپریٹنگ سسٹم کا رویہ اس بات پر منحصر کرے گا کہ یہ کس چیز میں استعمال کیا جا رہا ہے۔
اپنے پیش رو آپریٹنگ سسٹم کے برخلاف اس کے صارفین کو ڈیسک ٹاپ موڈ سے ٹچ فوکسڈ موڈ کے متبادل میں منتقل کرنے کی ضرورت نہیں پڑے گی۔
واضح رہے کہ اس سے قبل ونڈوز8 کی اپنے گذشتہ ورژن سے بہت زیادہ مختلف ہونے کے لیے تنقید ہوئی تھی اور اس وجہ سے بہت سی تنظیمیں اس سے دور ہی رہیں۔
پہلے اس میں سٹارٹ بٹن نہیں تھا لیکن بعد میں جب اس میں یہ بٹن شامل کیا گیا تو یہ یا تو ٹچ فوکسڈ انٹر فیس پر جاتا تھا یا پھر ماؤس پریس نظام پر جبکہ نئے نظام میں دونوں پر بر وقت جانا ممکن ہوگا۔
اس کے اجرا کے تقریباً ایک سال بعد ہی کمپنیوں نے اپنے آئی ٹی عملے کو اس کی ٹیکنالوجی سے ہم آہنگ ہونے کا موقع دیا تھا لیکن دو سال بعد ہی وہ فروخت کے لیے پیش کیا گیا تاہم اب بھی اس بہت کم اپنایا جا رہا ہے۔
فوریسٹر کمپنی کے ڈیویڈ جانسن کا جو مائیکروسافٹ پر نظر رکھتے ہیں، کہنا ہے کہ ’مائیکرو سافٹ کے لیے یہ انتہائی اہم ہے کہ وہ ونڈوز 10 کو درست رکھے۔‘
’ونڈوز 8 ابھی پانچ میں سے صرف ایک کمپنی میں ملازموں کو فراہم کرایا جا رہا ہے۔ ڈیسک ٹاپ کے ماحول والی کمپنیوں میں ابھی بھی ونڈوز 7 ہی اصلی معیار ہے۔‘
انھوں نے کہا کہ ’دنیا بھر میں پھیلے ٹیکنالوجی کے صارفین کے لیے بہترین اور جدید ترین ٹیکنالوجی فراہم کراتے رہنے کے لیے مائکروسافٹ کو متبادل کی ضرورت تھی اور ونڈوز 10 ان کی بہترین پیشکش ہے۔‘
تازہ سروے کے مطابق مجموعی طور پر پی سی کی دنیا میں صرف 13 فیصد کمپیوٹرز پر ونڈوز 8 سسٹم استعمال کیا جا رہا ہے۔
اس کے برعکس 50 فیصد کمپیوٹروں پر ونڈوز 7 اور 24 فیصد کمپیوٹرز پر ونڈوز ایکس پی استعمال ہو رہی ہے۔ یاد رہے کہ اب مائیکروسافٹ ونڈوز ایکس پی کو سپورٹ نہیں کرتی
مسٹر جانسن کا کہنا ہے کہ سٹارٹ مینو کی از سر نو شمولیت سے ونڈوز10 کی بہتر کارکردگی ہوگی۔
انھوں نے کہا کہ ’یہ ناگزیر اور اہم ہے۔‘
اس ہفتے کے آخر میں مائکروسافٹ لیپ ٹاپ اور ڈیسک ٹاپ کے لیے اپنے شروعاتی صارفین کو ونڈوز کا ’ٹیکنیکل پریویو‘ فراہم کرے گا۔
امریکہ سے ٹیکنالوجی پر نظر رکھنے والے بی بی سی کے نمائندے رچرڈ ٹیلر کا کہنا ہے کہ ’حتمی طور پر ونڈوز 10 کی کامیابی اس کی کارکردگی پر منحصر ہوگی لیکن اتنا ضرور ہے کہ نئی قیادت میں مائیکروسافٹ یہ ظاہر کر رہی ہے کہ وہ لوگوں کی بات سن رہی ہے۔‘
ان کے مطابق ’اگر اسے اینڈروئیڈ اور ایپل کی پیش قدمی کو روکنا ہے اور حسب حال بنے رہنا ہے تو اسے عوام کی بات سننی پڑے گی۔
